News - FH Graubünden

Menu
News
Dapli Grischunas e Grischuns a la SAS Grischun

Dapli Grischunas e Grischuns studegian a la Scola auta spezialisada dal Grischun

19. September 2022

Oz cumenza il nov semester a la Scola auta spezialisada dal Grischun (SAS Grischun). Malgrà in martgà difficil èn s'immatriculadas puspè var 2'400 persunas per ina scolaziun u in perfecziunament. Legraivel è l'augment da Grischunas e Grischuns che han decis da far in studi da bachelor u da master. Grazia a purschidas novas sa resulta tar ils studis da master consecutivs ina creschientscha da ferms 59 pertschient. Tut en tut cumenzan 593 studentas e students in studi da bachelor u da master a la SAS Grischun.

Da totalmain 593 studentas e students èn 21 pertschient Grischunas e Grischuns. Quai correspunda ad in augment da 17 pertschient. 48 pertschient da las persunas che cumenzan lur studi èn dunnas. 499 umans giuvens entschaivan in studi da bachelor d'architectura, inschigneria da construcziun, economia da manaschi, Computational and Data Science, Digital Business Management, Digital Supply Chain Management, Information Science, Mobile Robotics, Multimedia Production, Photonics, management da sport e turissem. Quai signifitga in regress da diesch pertschient cumpareglià cun l'onn precedent.

Il dumber d'annunzias per in studi da master consecutiv s'augmenta però il semester d'atun 2022 per ferms 59 pertschient, in resultat ch'ins po attribuir er a novas purschidas. 72 studentas e students fan part da las classas pionieras da las purschidas da master Sustainable Business Development, Data Visualization ed User Experience Design. L'emprim è in'approfundaziun dal studi da master consecutiv Business Administration che cumpiglia medemamain las purschidas New Business e Tourism and Change, ina disciplina che vegn manada en englais. En tut han 94 studentas e students cumenzà oz in studi da master consecutiv. L'augment da las studentas e dals students da master cumpensescha bunamain dal tut il regress sin il stgalim da bachelor.

Duas persunas immatriculadas da nov derivan da la scola auta partenaria a Shanghai ed absolvan directamain il davos onn da studi da la classa da turissem englaisa sin il stgalim da bachelor. Otg studentas e students da scolas autas da la Svizra e da l'exteriur frequentan in semester a la SAS Grischun. En pli sa participeschan 33 studentas e students da la SAS Grischun ad in barat scolastic e passentan in semester ad ina scola auta partenaria.

«Jau hai plaschair che nus avain pudì schlargiar nossa paletta da purschidas cun studis per part unics en Svizra. Ch'i sa tracta quest onn da purschidas da master consecutivas consideresch jau sco impurtant, perquai che nus pudain offrir a las absolventas ed als absolvents da studis da bachelor – e sa chapescha er ad auters – pussaivladads interessantas per lur ulteriur svilup», sa legra il rectur Jürg Kessler. «Pervia da las annadas cun paucas naschientschas è daventada pli gronda la concurrenza tranter las scolas autas spezialisadas en Svizra. Che l'interess per las purschidas da bachelor e da master da la SAS Grischun è anc adina grond mussa a mai che noss studis orientads als basegns e per part unics èn ina via che porta success – er a favur dal Grischun.» Sco gia l'onn passà èn var 2’400 persunas s'immatriculadas per in studi da bachelor, da master u da perfecziunament a la SAS Grischun.

Trais novas purschidas da master fan lur entschatta

Per l'emprima giada insumma van uss a scola a Cuira futurs visualisaturs da datas, designras dad User Experience ed expertas ed experts per Sustainable Business Development. Ils dus ultims roms èn unics en Svizra sco purschida da master consecutiva. Las purschidas da master Data Visualisation ed User Experience Design èn approfundaziuns dal studi da master consecutiv User Experience Design & Data Visualization che la regenza dal chantun Grischun ha approvà avant var in onn. La purschida reagescha sin la digitalisaziun cuntinuanta en la societad ed en l'economia che ha per consequenza in svilup permanent da soluziuns digitalas. Lur realisaziun dependa da las pretensiuns specificas da las utilisadras e dals utilisaders da differents contexts applicativs e da diversas branschas. La purschida correspunda a duas finamiras dal program da la regenza 2021-2024: rinforzar il Grischun sco plazza da furmaziun e perscrutaziun e sustegnair la transfurmaziun digitala en il chantun.

Il studi da master Sustainable Business Development scolescha realisaturas e realisaturs che fan avanzar il svilup persistent dad interpresas. En emprima lingia vai per elavurar e francar models da fatschenta duraivels e strategias correspundentas en las interpresas e quai cun resguard da l'ambient, la societad e l'economia. Ma er ils champs d'acziun globals dal svilup persistent, la communicaziun duraivla e la midada da modas da pensar e d'agir usitadas en vista d'in patratgar persistent èn elements integrals da quest studi. Las studentas ed ils students emprendan co che las interpresas pon chapir il svilup duraivel sco schanza e tge niz che las novas pussaivladads han per ellas. La purschida va a prà stupent cun la strategia da persistenza che la SAS Grischun ha implementà gia dapli blers onns.

Studegiar e perscrutar sco fugitiva e fugitiv

La guerra en l'Ucraina ha drizzà pli fermamain l'attenziun sin la situaziun dad umans che ston fugir. Gia en il passà ha la SAS Grischun surpiglià cun soluziuns individualas per fugitivas e fugitivs ina responsabladad sociala impurtanta. La guerra en l'Ucraina ha però manà ad ina dumonda marcantamain pli gronda e per quest motiv ha la scola formalisà la purschida per fugitivas e fugitivs. A partir dal semester d'atun 2022 cumenzan in student cun il status S ed in student cun il status F lur studi a la SAS Grischun. En pli entschaiva in praticant cun il status F sia lavur en in ambient scientific. In perscrutader cun il status S è pront per cumenzar. El è spezialist per l'anticorrupziun, surtut en il sport, ed elavura soluziuns che pon vegnir applitgadas per la reconstrucziun da l'Ucraina suenter la guerra. Per sustegnair perscrutadras e perscrutaders che vivan en privel en lur patria è la SAS Grischun dapi quest onn commembra da Scholars at Risk. Ultra da la protecziun da scienziadas e scienziads smanatschads s'engascha questa rait internaziunala per la promoziun e la defensiun da libertads academicas.

Ulteriurs detagls:

Ulteriuras infurmaziuns:
Jürg Kessler, rectur
+41 81 286 24 25
juerg.kessler@fhgr.ch


Scola auta spezialisada dal Grischun
Sco scola auta agila furman il pensar dinamic e l'agir proactiv las lingias directivas da la SAS Grischun. Cun questa tenuta contribuescha ella cun persistenza a la concepziun da l'avegnir. Il studi e la perscrutaziun èn interdisciplinars e s'orienteschan tenor las sfidas praticas da l'economia e da la societad. Cun sias purschidas da scolaziun pussibilitescha ella a sias studentas ed a ses students, en tut var 2400, da daventar persunalitads fitg qualifitgadas e responsablas. La scola auta porscha studis da bachelor e master sco era perfecziunaments en ils roms architectura, inschigneria da construcziun, Computational and Data Science, Digital Supply Chain Management, Information Science, Management, Mobile Robotics, Multimedia Production, Photonics e turissem. En sia perscrutaziun focussescha ella sin las tematicas tecnologias futuras applitgadas, svilup en il territori alpin ed agir d'interpresa ed ella participescha er a laboratoris reals. La participaziun da tut las commembras e da tut ils commembers da la scola auta contribuescha al svilup da la scola auta spezialisada e da sia qualitad.

Ils novs studentas e students sa scuntran sin l'occurrenza da cumenzament a Cuira.
Ils novs studentas e students sa scuntran sin l'occurrenza da cumenzament a Cuira.
Studentas e students dal master "Sustainable Business Development" plantan in ischi da muntogna.
Studentas e students dal master "Sustainable Business Development" plantan in ischi da muntogna.
Per l'emprima giada avieschan studentas e students il master "User Experience Design & Data Visualization".
Per l'emprima giada avieschan studentas e students il master "User Experience Design & Data Visualization".