News - FH Graubünden

Menu
News
SAS Grischun cun ina nulla naira l'onn 2021

Rapport annual 2021

13. Juni 2022

En il rapport annual 2021 guarda la Scola auta spezialisada dal Grischun (SAS Grischun) enavos sin in onn plain success e sfidas. Passa 600 studentas e students han cumenzà l'atun 2021 in studi da bachelor u da master. La pandemia da COVID-19 ha però difficultà vinavant las cundiziuns en la perscrutaziun ed en il mintgadi da studentas e students, persunas d'instrucziun e collavuraturas e collavuraturs.

Studegiar a la SAS Grischun è stà popular era durant il segund onn da corona: 604 studentas e students han cumenzà il settember 2021 in studi da bachelor u da master a la scola auta grischuna. Il dumber è in zic pli bass cumpareglià cun l'onn precedent, ma en la cumparegliaziun sur plirs onns pon ins discurrer d'in dals onn cun las pli bleras annunzias. En tut èn stads immatriculads l'onn passà passa 2400 studentas e students per ina scolaziun u in perfecziunament a la SAS Grischun.

Pervia da la pandemia da COVID-19 ha però la svieuta en la perscrutaziun fatg progress mo plauns: la svieuta totala che la SAS Grischun ha fatg l'onn 2021 cun projects da perscrutaziun e da servetschs è sa sminuida per 1,9 pertschient sin CHF 10,4 milliuns en cumparegliaziun cun l'onn 2020. Ina buna survista davart las activitads da perscrutaziun a la SAS Grischun dat il rapport «In sguard en la perscrutaziun – ediziun matg 2022» ch'è vegnì publitgà dacurt.

Patruna attractiva

Tut en tut serra la SAS Grischun l'onn 2021 cun in gudogn da CHF 0,39 miu. (2020: CHF 9'450). Ils custs da persunal sco era las expensas per material e servetschs èn creschids en summa sutproporziunalmain cumpareglià cun ils retgavs ed han pussibilità in surpli dal retgav. Uschia pon ins constatar sin la vart dals retgavs in augment da CHF 2,72 miu. cumpareglià cun l'onn precedent. En vista a la pandemia da COVID-19 è quai in resultat legraivel.

L'onn passà ha la SAS Grischun occupà 312 persunas (direcziun da scola, scolaziun e perfecziunament, perscrutaziun, servetschs ed administraziun, emprendissadis) en pensums fixs. Gia dapi il 2004 scolescha la scola auta er emprendistas ed emprendists, actualmain sis persunas en tschintg professiuns. Vitiers vegnan 426 persunas incumbensadas per l'instrucziun e 536 docentas e docents envidads. Quai dat in total da 1274 persunas per l'onn 2021.

Contribuziun al svilup regiunal

Parallelamain al program da la Regenza dal chantun Grischun per la perioda 2021-2024 ha la SAS Grischun lantschà sia nova perioda strategica. L'onn onn 2021 è stà en il center l'accent da svilup strategic «Emprender per vita duranta a moda innovativa» cun formats d'instruir e d'emprender innovativs. Il tema da focus l'onn 2022 è «Contribuziun al svilup regiunal». Ultra d'ina contribuziun a la concepziun dal Grischun sco plazza economica vul la scola auta render accessibels potenzials da valurisaziun en il chantun.

In exempel è il program da certificaziun en dus stgalims, sviluppà en cooperaziun cun la Banca Chantunala Grischuna e la MINT-Academy, che vegn purschì a partir dal 2022. Quel vul preparar collavuraturas e collavuraturs sin las midadas che la digitalisaziun porta.

Ina part tuttina essenziala gioga il concept dals laboratoris reals. Els porschan il rom da sa fatschentar cun las sfidas ed ils temas en la regiun ensemen cun tut ils acturs per chattar soluziuns communablas per l'avegnir. Gia averts èn laboratoris en Surselva ed en Bregaglia. Ils ulteriurs accents en questa perioda strategica sa deditgeschan al center da la scola auta, a la tecnica ed a la sanadad.

Ulteriurs detagls (en tudestg):

Ulteriuras infurmaziuns:
Arno Arpagaus, directur administrativ
+41 81 286 24 28
arno.arpagaus@fhgr.ch

Scola auta spezialisada dal Grischun
Sco scola auta agila furman il pensar dinamic e l'agir proactiv las lingias directivas da la SAS Grischun. Cun questa tenuta contribuescha ella cun curaschi e persistenza a la concepziun da l'avegnir. Cun sias purschidas da scolaziun pussibilitescha ella a sias studentas ed a ses students, en tut passa 2400, da daventar persunalitads fitg qualifitgadas e responsablas. La SAS Grischun porscha studis da bachelor e master sco era perfecziunaments en ils roms architectura, inschigneria da construcziun, Computational and Data Science, Digital Supply Chain Management, Information Science, Management, Mobile Robotics, Multimedia Production, Photonics, Service Design e turissem. L'instrucziun e la perscrutaziun a la SAS Grischun èn interdisciplinaras e s'orienteschan tenor las sfidas praticas en l'economia e la societad. La participaziun da tut las commembras e da tut ils commembers da la scola auta contribuescha al svilup da la qualitad e da l'entira scola auta spezialisada. fhgr.ch