Dapi la fundaziun dal Tecnicum da la saira a Cuira l'onn 1963 e l'engrondiment l'onn 1988, cura ch'ins ha amplifitgà il champ da l'economia cun il champ da la tecnica, n'è betg mo sa midà, s'extendì e s'adattà d'in cuntin il num, mabain era la purschida da la scola. Uschia ha la SAS Grischun cumenzà ses manaschi da studi cun tschintg purschidas en ils roms architectura, inschigneria da construcziun, chemia, electrotecnica e construcziun da maschinas. Dapi lura è la spierta creschida enormamain e cumpiglia oz tredesch purschidas da bachelor, set purschidas da master consecutivas e numerus studis e differents curs da perfecziunament. «La SAS Grischun è sa sviluppada ils ultims 60 onns ad in juvel en la cuntrada da scolas autas svizras. Per l'economia en il chantun Grischun surpiglia ella oz in'impurtanta funcziun d'antenna», di la presidenta dal cussegl da la SAS Grischun, Brigitta M. Gadient.

Ina finamira che la scola auta ha adina persequità en tut quels onns: ella vul gidar a sminuir la mancanza da persunal qualifitgà. Grazia als studis orientads a l'entir pajais e che resguardan ils basegns da la regiun pon ins porscher ina tscherna vasta da studis. Ils studis che vegnan lantschads da nov prest mintg'onn èn singulars en l'entira Svizra, cura ch'els vegnan introducids. L'exempel il pli nov è la purschida da bachelor «Artificial Intelligence in Software Engineering» che vegn lantschada l'atun 2024. Mo uschia po la SAS Grischun attrair studentas e students d'ordaifer ils cunfins chantunals per promover il braingain per las branschas regiunalas.

Rinforzament regiunal grazia a la collavuraziun surregiunala

Cun mintga onn da sia existenza ha la SAS Grischun generà nova savida da projects ed extendì la collavuraziun cun las scolas autas universitaras. Quest know-how dat ella vinavant a sias studentas e ses students, als partenaris da perscrutaziun, ma er a l'economia, la publicitad e l'administraziun. Cuntrari generescha ella savida da projects da perscrutaziun ensemen cun manaschis ed instituziuns dal chantun e questa savida dovra ella cun success en projects cun partenadis surregiunals.

Era grazia a sia orientaziun naziunala ed a sia attracziun internaziunala amplifitgescha la SAS Grischun sias raits a moda structurada cun interpresas localas, instituziuns da perscrutaziun, las regiuns e l'administraziun e porscha maun da rinforzar la cumpetitivitad dal Grischun en il senn da l'incumbensa dal Grischun sco chantun purtader. «La collavuraziun stretga cun differentas partenarias e differents partenaris ed instituziuns ha gidà a sviluppar la SAS Grischun ad in'instituziun da furmaziun impurtanta ed in motor per innovaziun e svilup en la regiun», ha accentuà dr. Jon Domenic Parolini, schef dal Departament d'educaziun, cultura e protecziun da l'ambient dal chantun Grischun. Vitiers vegn il sustegn da las interpresas localas e dals start-ups cun il center per interpresas pitschnas e mesaunas che la SAS Grischun maina per incumbensa dal Chantun.

A moda agila en il futur – a favur dal Grischun

Er en l'avegnir vul la SAS Grischun schlargiar sia purschida e gidar a sminuir la mancanza da persunal qualifitgà er en ulteriuras branschas. En in proxim pass vul ella porscher ensemen cun il Center da furmaziun per la sanadad ed ils fatgs socials ed ulteriuras instituziuns dal provediment da sanadad in studi da tgira cun il focus sin ils spazis decentrals, uschia sco quai ch'è il Grischun sco chantun da muntogna. Era sin la plazza da perscrutaziun Grischun vul la SAS Grischun contribuir vinavant a moda relevanta tant suletta sco er en cooperaziun cun las autras instituziun da perscrutaziun en il chantun Grischun. Plinavant sa vesa ella – confurm  al trend global – sco partenaria da furmaziun per l'emprender per vita duranta.

Sco ina da las pli grondas patrunas en il Grischun cun radund 350 collavuraturas e collavuraturs stabels e passa 500 docentas e docents, prenda la SAS Grischun era vair sia responsabladad sociala sco manaschi d'emprendissadi. «Mirveglias, engaschi ed adina puspè novas ideas realisadas mettan il fundament per nossa lunga istorgia da success. Sco sola auta agila vulain nus influenzar er ils onns vegnents il futur da noss chantun», accentuescha prof. Jürg Kessler, rectur e parsura da la direcziun da la Scola auta spezialisada.

Dapli detagls

• 60 onns SAS Grischun: fhgr.ch/rm/60
• Ediziun da giubileum da la revista Wissensplatz dal settember 2023: Raits - SAS Grischun (fhgr.ch)