Cura che jau sun entrada en mes uffizi era bler en moviment. La STE da Cuira da quella giada disponiva gia da studis innovativs, d'ina ferma enragischaziun regiunala e natiralmain da collavuraturas e collavuraturs engaschads. Al medem mument èsi stà perceptibel: questa scola auta vuleva dapli. Ella ha vulì porscher a studentas e students perspectivas attractivas, rinforzar la perscrutaziun e contribuir uschia ad in'economia innovativa, ad ina societad orientada a l'avegnir ed ad in ferm chantun Grischun. Tgi che lascha repassar ils onns passads realisescha spert: La SAS Grischun n'ha mai spetgà ch'il temp sa midia, ella l'ha prendì per mauns ed ha agì.

Il settember 2019 è stà in exempel spezialmain impressiunant en quest connex. Curt avant il cumenzament da l’onn da studi è la STE Cuira daventada la SAS Grischun. Il nov num è stà expressiun d'ina chapientscha da sasez creschida ed al medem temp in segn visibel per in pass bler pli grond: la via vers l'independenza. L'entschatta dal 2020 è la SAS Grischun daventada l'otgavla scola auta spezialisada da dretg public da la Svizra. Gist en il senn dal citat menziunà a l'entschatta è quest pass stà da gronda impurtanza. Pertge che l'independenza ha dà a la scol'auta – ensemen cun la regenza dal chantun Grischun – la pussaivladad da concepir ses avegnir da maniera independenta, da metter agens accents e da surpigliar responsabladad or d'atgna forza.

Il cler consentiment dal suveran grischun dals 12 da mars 2023 per il Center da la Scola auta spezialisada dal Grischun è era stà significativ per il svilup da la SAS Grischun durant mes temp d'uffizi. Questa decisiun è stada in ferm signal per l'avegnir da noss chantun ed ha stgaffì la basa per  la scola auta per pudair realisar sia voluntad da furmaziun da maniera anc pli concreta. Il Center da la Scola auta spezialisada n'è numnadamain betg mo in project da construcziun impressiunant, mabain al medem temp in confess a la furmaziun, a l'innovaziun ed a la perscrutaziun en il Grischun. El stgaffescha premissas per permetter a la scola auta da sa sviluppar vinavant sco lieu da barat, da collavuraziun interdisciplinara e d'innovaziun. Cun la badigliada il november 2024 è quest project da l'avegnir daventà realitad. Il process da construcziun è en plaina acziun, ed ils progress èn bain visibels en il fratemp  – in segn cler che la scola auta concepescha vinavant ses avegnir da maniera activa.

Sche jau dun oz in sguard enavos sin mes temp en il cussegl da la scola auta, lura resent jau oravant tut ina chaussa: grond respect envers tut ils umans che han pussibilità quests svilups. Ils dudesch onns passads èn stads caracterisads da curaschi, engaschi e voluntad da concepir. La SAS Grischun n'ha mai spetgà ch'il temp sa midia; ella ha agì.

La fin da zercladur va a fin mes temp en il cussegl da la scola auta pervia da la limitaziun dal temp d'uffizi, ed jau surdun il presidi cun gronda fidanza che la SAS Grischun vegnia ad ir vinavant sia via cun success – cun il Center da la Scola auta spezialisada sco simbol per la prontadad da furmar il futur a moda decidida.

Text: Brigitta M. Gadient, presidenta dal cussegl da la scola auta / Fotografia: SAS Grischun