Ils 28 da november 2023 ha il cussegl da la scola auta tschernì prof. dr. Gian-Paolo Curcio sco nov rectur da la SAS Grischun. El surpiglia ses uffizi il 1. da schaner 2025 da prof. Jürg Kessler che maina la scola auta dapi passa 20 onns sco rectur. Per garantir ina buna surdada, vegn Gian-Paolo Curcio ad entrar gia il 1. da november 2024 en la scola auta. Uschia po el profitar d’in stretg barat cun Jürg Kessler e vegn introducì pass per pass en las incumbensas. «Jau sun persvasa che nus avain chattà cun Gian-Paolo Curcio la persunalitad adattada per manar la SAS Grischun en in bun futur resguardond ils princips da nossa strategia», sa legra Brigitta M. Gadient, presidenta dal cussegl da la scola auta, da la tscherna. Sias vastas experientschas en il sectur da las scolas autas sajan enorm preziusas.

Generar savida, laschar circular ella e servir uschia a la societad

Gian-Paolo Curcio ha 47 onns e lavura dapi prest 13 onns a la Scola auta da pedagogia dal Grischun, l’emprim sco vicerectur e manader da partiziun da la furmaziun da basa e dapi la stad 2014 sco rectur. Suenter il seminari da scolastas e scolasts dal Vallais Sura a Brig ha il Vallesan studegià pedagogia e psicologia pedagogica, istorgia contemporana ed istorgia dal temp nov a l’Universitad da Friburg. Suenter il licenziat ha Gian-Paolo Curcio lavurà sco assistent scientific a l’Academia militara da la SPF/ETH Turitg ed ha promovì davart il tema «Verantwortungsmotivation. Zwischen Moralität und Gerechtigkeit. Eine empirische Untersuchung zum Entscheidungsverhalten von militärischen Führungskräften». Suenter ulteriurs engaschaments sco manader da project a la professura da scienzas d’educaziun da l’Universitad da Friburg ed intgins onns sco uffizier professiunal en l’armada svizra ha sia via manà el en il Grischun a la Scola auta da pedagogia. Durant sias activitads sco prorectur resp. rectur ha el absolvì in studi supplementar da General Management (Executive MBA) a la HSG a Son Gagl. Sco uffizier da milissa en il rang d’in colonel en il stab general presta el ses servetsch actualmain sco schef inferiur novitads ed a partir dal 1. da schaner 2024 sco schef da stab da la divisiun territoriala 3.

«Cun lur engaschi surpiglian las scolas autas en il chantun Grischun responsabladad per ina societad futura funcziunanta», accentuescha Gian-Paolo Curcio l’impurtanza da la furmaziun terziara e da la perscrutaziun per il Grischun. «Las scolas autas han l’incumbensa da generar savida e da laschar circular quella savida. Uschia prestan ellas in servetsch impurtant per la societad e gidan a dumagnar las sfidas dal futur», declera Curcio e cumplettescha che la scienza, la perscrutaziun ed il svilup gioghian ina rolla centrala. Il rectur designà sa legra da prender per mauns las incumbensas da la SAS Grischun ensemen cun tut las commembras ed ils commembers da la scola auta, cun il sustegn dal chantun Grischun e la cooperaziun da partenaris da l’economia e da la furmaziun.

Dapi il 1. da settember 2003 è Jürg Kessler il directur da la SAS Grischun. El ha manà la scola auta l’onn 2020 en l’independenza. L’atun 2021 ha il cussegl da la scola auta decis da prolungar ses engaschi sur la vegliadetgna da pensiun per dus onns fin il 2024.