Gruppa professiunala da linguas estras - SAS Grischun

menu
Servetschs per studentas e students
Gruppa professiunala da linguas estras
Survista

Survista

«Ils cunfins da mia lingua muntan ils cunfins da mes mund». (Ludwig Wittgenstein)

«Nus essan digital persunal». (SAS Grischun)

Il «mund», per il qual nus preparain nossas studentas e noss students a la SAS Grischun, sa distingua tras las tecnologias las pli modernas, models da fatschenta innovativs, in’economia persistenta, multimedialitad e process digitals. La basa da quest mund èn colliaziuns che creschan permanentamain, cooperaziuns naziunalas ed internaziunalas, la dumonda da datas e d’infurmaziuns actualas e fidadas sco er il basegn per novs concepts e per soluziuns progressivas.

Per pudair reussir e brigliar en quest mund ston nossas absolventas e noss absolvents pudair communitgar a moda effectiva e suverana. Independentamain dal fatg, sch’ellas ed els vulan esser activ en l’entira Svizra u sin l’entir mund: Enconuschientschas da linguas estras simplifitgeschan l’access als contacts da fatschenta, megliereschan l’access a las fieras, schlargian las retschertgas ed augmentan la ritgezza da products e da servetschs. Curt: Els extendan l’orizont tecnologic ed economic.

Tgi che chapescha da communitgar persunalmain ed orientà a gruppas en mira en in mund digital, scuvra meglras soluziuns, cuntanscha dapli clientella, persvada dapli partenaris e schlargia ses cunfins. Sin viadi or en il grond e vast mund digital sustegna la SAS Grischun sias studentas e ses students cun ina purschida da linguas estras multifara.

Purschida da linguas

Purschida da linguas

Per bleras da nossas absolventas e da noss absolvents èn enconuschientschas d’englais fundadas necessarias. La SAS Grischun metta entaifer il rom d’englais a disposiziun ina purschida correspundenta da moduls obligatorics e da moduls d’elecziun obligatorics. Quai tant areguard la professiun (p.ex. Business English) sco er en dumondas generalas (C1 Advanced u C2 Proficiency). Quests moduls pon dentant er vegnir visitads facultativamain sco moduls d’elecziun –  uschia noss curs da spagnol, talian, franzos, russ, tudestg sco lingua estra, sursilvan u rumantsch grischun. Tut tenor la dumonda purschain nus quests curs da lingua sin differents nivels. Nus cun nossa pitschna scola auta spezialisada e persunala essan loschs da disponer davart in program cun curs da linguas uschè vast!

RECR e tests da classificaziun

RECR e tests da classificaziun

Il RECR (Rom europeic communabel da referenza per las linguas) cun ses sis nivels (A1 fin C2) furma la basa per blers da noss curs da lingua ed a medem temp il rom da referenza per gruppas d’emprender omogenas (ulteriuras infurmaziuns davart il RECR chattan ins qua [Tudestg]). A l’entschatta d’in curs da lingua vegnan nossas studentas e noss students classifitgads en in modul adattà cun agid da certificats da lingua ch’èn gia avant maun. Suenter avair passà il modul, pon els cuntinuar en il proxim nivel ed uschia engrondir successivamain lur enconuschientschas linguisticas.

En cas ch’in certificat da lingua n’è betg avant maun, pon ils tests da classificaziun esser utils per tscherner in curs da lingua adattà. Ils resultats da quests tests ch’èn fermamain simplifitgads e ch’èn limitads sin abilitads receptivas (leger, udir) inditgeschan il nivel che vegn recumandà per frequentar ils curs.

Persunal d’instrucziun e grondezza dal curs

Persunal d’instrucziun e grondezza dal curs

Noss persunal d’instrucziun qualifitgà sa caraterisescha particularmain tras sia expertisa da blers onns en la preparaziun per examens da certificat, che vegnan renconuschids sin plaun internaziunal. Ultra da quai sa perfecziunescha il persunal regularmain per esser sin il stan actual - quai areguard la lingua e la didactica sco er areguard l’applicaziun da tools digitals. Spezialmain losch è la SAS Grischun concernent l’engaschament persunal da nossas persunas d’instrucziun che pratitgeschan lur professiun cun entusiassem e che portan quest entusiassem en las gruppas d’emprender correspundentas. En cumbinaziun cun las pitschnas gruppas da curs da lingua a la SAS Grischun resulta pia in’atmosfera fitg persunala. Al persunal d’instrucziun pussibilitescha quai in’accumpagnament intensiv da las studentas e dals students. Ultra da las collavuraturas stablas e dals collavuraturs stabels ans sustegnan docentas e docents externs cumpetents cun l’instrucziun linguistica da nossas studentas e da noss students.

Certificats u retratga dal rom

Certificats u retratga dal rom

Dapi blers onns preparain nus nossas studentas e noss students cun success per examens da certificat renconuschids sin plaun internaziunal, per exempel Cambridge Assessment (englais), Cervantes (spagnol) e DELF/DALF (franzos). En quest connex cooperain nus cun providers d’examen renumads. Nus essan perfin sez in center d’examen renconuschì e faschain examens da certificat en atgna reschia (Cervantes/spagnol).

Ultra da quai purschain nus dapi intgins onns curs da linguas cun in ferm connex spezialisà (en englais enconuschent sut English for Specific Purposes). Uschia avain nus en il fratemp en il program ESP: Applied English for Architects and Civil Engineers sco er ESP:Applied English for Computational and Data Scientists u spagnol en la branscha turistica. E sche nossas studentas e noss students vulan sa preparar per ina dimora a l’exteriur, exercitain nus cun ellas ed els en noss curs Living English, co ch’ins avra in conto da banca a l’exteriur, co ch’ins fa in contract da locaziun u in’assicuranza da malsauns e co ch’ins s’adattescha a las usanzas culturalas.

Finamira

Finamira

Tut tenor purschida da studi e persunalitad han nossas studentas e noss students differents interess pertutgant il studi, tant areguard la professiun sco er areguard il privat. Ellas ed els disponan er da differentas enconuschientschas linguisticas. Perfin duas studentas e dus students cun «nivel d’englais B2» n’applitgeschan betg exactamain il medem vocabulari ed han differentas fermezzas e deblezzas concernent grammatica ed expressiun. Ina studenta preferescha da discurrer, l’auter student il scriver – las differenzas èn multifaras. Communablamain è dentant il fatg, che nus vulain promover tut nossas studentas e noss students durant lur temp a la SAS Grischun areguard lur enconuschientschas linguisticas, per ch’ellas ed els possian far gronds progress tar nus e rinforzar lur conscienza linguistica. Mo uschia pon ellas ed els – al cumenzament da lur vita professiunala – sa preschentar ed agir a moda suverana areguard il cumportament cun partenarias da fatschenta e clientella internaziunala. Per cuntanscher questa finamira dovri pazienza e diligenza. Per puspè discurrer cun pleds da Wittgenstein vali da percorscher e surmuntar ils agens cunfins. Sche nus pudain ultra da quai intermediar a las studentas ed als students quant plaschair ch’i po far da communitgar cun persunas d’autras naziuns, quantas chaussas bellas, interessantas e captivantas ch’ins po vesair en auters pajais, alura avain nus cuntanschì nossa finamira!

Ulteriuras infurmaziuns

Ulteriuras infurmaziuns

Ulteriuras publicaziuns e links:

Contact

Contact

Lecturer, Head of section