Wissensplatz

Scolas autas na scoleschan betg mo persunas qualifitgadas, mabain influenzeschan lur tenuta ed agir. La SAS Grischun prenda per mauns questa responsabladad. Il svilup persistent vesa ella sco princip fundamental che collia l'instrucziun, la perscrutaziun e la pratica. La SAS Grischun sviluppa soluziuns durablas per l'ambient, l'economia e la societad – ed abilitescha las studentas ed ils students d'analisar criticamain connexs e da surpigliar responsabladad.

Quest onn po la Scola auta spezialisada dal Grischun festivar ses giubileum da 60 onns. Sias raits e la collavuraziun cun represchentantas e represchentants da l'economia, la politica, l'administraziun ed autras instituziuns da scolas autas èn facturs-clav decisivs da la Scola auta spezialisada dal Grischun.

Sco chantun da muntogna stat il Grischun davant differentas sfidas. Sias regiuns èn confruntadas spezialmain cun ils effects da la globalisaziun, da la midada climatica u era da la midada demografica. Cun sias contribuziuns per la regiun sustegna la Scola auta spezialisada dal Grischun il Chantun en connex cun tals temas e gida el d'augmentar sia forza innovativa.