menu
novitads
Catalisatur per l'economia regiunala

La SAS Grischun è in catalisatur per l'economia regiunala

12.10.2022

La Scola auta spezialisada dal Grischun è in impurtant factur economic che dat en pli impuls a l'economia regiunala en il chantun. Quai mussa in nov studi da la BAK Economics AG e da l'econcept AG. Cun in franc subvenziunà dal chantun effectuescha la scola auta ina valurisaziun dad almain 4.3 francs. Ultra da quai stimulescha la SAS Grischun cun sia activitad da perscrutaziun e da svilup il progress tecnologic. L'edifizi nov planisà per il Center da scola auta spezialisada dal Grischun creescha plinavant ulteriurs potenzials da svilup.

La SAS Grischun ha generà l'onn 2021 cun ils 15 milliuns francs subvenziunads dal chantun 47.6 milliuns francs. Quella summa visualisescha la contribuziun da la scola auta spezialisada a la forza economica dal chantun Grischun. Sch'ins metta en relaziun l'entir effect da valurisaziun cun l'economia generala, correspunda quel import ad ina cumpart da var 0.5 pertschient da la forza economica chantunala. Per mintga franc subvenziunà dal chantun sa resulta damai ina valurisaziun brutta da 4.3 francs. En pli dettia il manaschi da la scola auta spezialisada differents impuls a l'economia regiunala, pon ins leger en il rapport publitgà dacurt. Latiers tutgan la cumpra da rauba e da servetschs en manaschis regiunals e las expensas da consum da las emploiadas e dals emploiads sco era da las studentas e dals students en il chantun.

Ina part substanziala da la valurisaziun effectuada dal manaschi da la SAS Grischun porta al chantun Grischun er entradas en furma da taglias. Latiers tutgan las pajas ed ils salaris bruts da las collavuraturas e dals collavuraturs che vivan en il chantun Grischun (CHF 21.9 miu.) ed ina gronda part dals effects da valurisaziun regiunals indirects en autras branschas (CHF 17.3 miu.). En pli sa domiciliescha radund ina da tschintg persunas che han absolvì la SAS Grischun suenter il studi en il Grischun e paja medemamain taglias al chantun ed a la vischnanca da domicil.

La scolaziun da giuvnas e giuvens è la pli impurtanta contribuziun

Las tecnologias da l'avegnir han gia oz ina gronda muntada per il Grischun sco lieu da perscrutaziun ed il basegn da spezialistas e spezialists en quel sectur dastgass crescher cuntinuadamain ils proxims onns. Cun ses accents da perscrutaziun, per exempel en ils secturs sensorica, robotica e fotonica, surpiglia la SAS Grischun ina rolla impurtanta en il sistem d'innovaziun regiunal. Cun introducir studis correspundents en il sectur spezial «Medias, tecnica ed IT» che gidan a crear cumpetenzas e scolar persunas qualifitgadas futuras fa la SAS Grischun ina contribuziun impurtanta per cuvrir il basegn da spezialistas e spezialists. Grazia a ses programs da perfecziunament gida ella en pli lavurantas e lavurants cun experientscha pratica che vivan en il chantun da sa sviluppar professiunalmain e sustegna il medem mument l'economia d'occupar posiziuns da spezialistas e spezialists e da cader. Differents acturs en il chantun èn da l'opiniun che la pli impurtanta contribuziun da la SAS Grischun al svilup da l'economia regiunala saja la scolaziun da giuvnas e giuvens fitg qualifitgads. Tenor il rapport da la BAK procuria la scola auta spezialisada per in provediment multifar dal martgà da lavur chantunal adattà a la structura ed al svilup. Ses mandat da prestaziun envers il chantun da rinforzar il lieu d'economia, da scola auta e da perscrutaziun adempleschia la SAS Grischun tenor il rapport «a moda cumplessiva, adequata ed efficazia».

Il center da scola auta spezialisada dat impuls a l'economia regiunala

Da gronda impurtanza per l'economia regiunala saja tenor il rapport da la BAK Economics AG e da l'econcept AG l'edifizi nov planisà per il center da scola auta spezialisada. Cun il center vegnia la funcziun d'infrastructura futura da la SAS Grischun segirada ed amplifitgada per l'economia regiunala, scrivan las auturas ed ils auturs. Il nov center da scola auta spezialisada permettia d'optimar process da manaschi, da promover il barat interdisciplinar e da rinforzar transfers da savida e da tecnologia. Durant la fasa da svilup e da construcziun dettia il center da scola auta spezialisada però er impuls a l'economia regiunala. Cun las investiziuns bruttas en l'autezza da 178 milliuns francs èn numnadamain era colliadas numerusas incumbensas per interpresas regiunalas. En total va cun 64.2 milliuns francs ina part substanziala da las spesas d'investiziuns en furma da valurisaziun en favur da l'economia regiunala en il chantun.

In player etablì tranter las scolas autas

Grazia a l'amplificaziun cuntinuanta da la purschida da roms e dals programs da perscrutaziun è er il dumber da studentas e students creschì fermamain ils ultims onns: tranter il 2015 ed il 2021 è quel s'augmentà per 68 pertschient. Da las 1'971 absolventas ed absolvents d'in studi da master e da bachelor (stadi: october 2021) abitavan 74.5 pertschient avant il studi en auters chantuns e var 8.5 pertschient a l'exteriur. Questas cifras conferman la relevanza e l'acceptanza da la SAS Grischun lunsch sur ils cunfins chantunals e mussan che la scola auta è daventada in player etablì tranter las scola autas da la Svizra. Ultra da quai crescha er il dumber da studentas grischunas e students grischuns a la SAS Grischun. Da las persunas s'inscrittas da nov per il semester d'atun 2022 per in studi da bachelor e master derivan 21 pertschient dal Grischun, quai che correspunda ad in augment da 17 pertschient. «Sulettamain grazia a studis che satisfan als basegns da la regiun ed èn da l'autra vart unics en Svizra, ha la SAS Grischun pudì crescher e porscher a giuvnas Grischunas e giuvens Grischuns ina spierta multifara», di il rectur Jürg Kessler.

Ulteriurs detagls:

Ulteriuras infurmaziuns:

Jürg Kessler, rectur e directur da la SAS
+41 81 286 24 25
juerg.kessler@fhgr.ch

ulteriuras infurmaziuns

Scuola universitaria professionale dei Grigioni

Quale scuola universitaria intraprendente, la SUP Grigioni punta sul pensiero dinamico e sull’approccio proattivo. Con questo modo di pensare contribuisce a plasmare il futuro in modo sostenibile. L’insegnamento e la ricerca presso la Scuola universitaria professionale dei Grigioni sono interdisciplinari e orientati alle sfide pratiche nell’economia e nella società. La SUP Grigioni forma i suoi ben 2'400 studenti a diventare personalità altamente qualificate e responsabili. Essa offre cicli di studio e corsi di perfezionamento in Architettura, Ingegneria civile, Computational and Data Science, Digital Supply Chain Management, Information Science, Management, Mobile Robotics, Multimedia Production, Photonics nonché in Turismo. Nella propria ricerca, la SUP Grigioni si concentra sui temi delle tecnologie future applicate, dello sviluppo nell’area alpina e dell’attività imprenditoriale, agendo anche in modo partecipativo all’interno di laboratori reali. La partecipazione attiva di tutti gli attori della scuola universitaria contribuisce al continuo sviluppo della stessa nonché della qualità dell’intero l’istituto. fhgr.ch