Dapi quest onn è l'anteriur center «Data Analysis, Visualization, and Simulation» in agen institut. Il nov institut «Data Analysis, Artificial Intelligence, Visualization, and Simulation», curt e net DAViS, ha ussa pia da nov quatter incumbensas da prestaziun (scolaziun, perfecziun, perscrutaziun e servetschs). «Jau sun losch ch'il center DAViS è daventà in institut independent. Quai gia suenter tschintg onns, malgrà che la contribuziun dal Chantun che nus avevan retschavì a sias uras era pensada per ina durada dal project da sis onns», di prof. dr. Bruno Studer, il manader dal departament Tecnologias dal futur applitgadas e commember da la direcziun da la scola auta.

Il manader dal nov institut DAViS è prof. dr. Heiko Rölke. El ha gia manà il center DAViS dapi la fundaziun da lez. Heiko Rölke lavura dapi l'avrigl 2017 sco docent per Data Science a la SAS Grischun ed ha surpiglià il svilup e la direcziun da la perscrutaziun dal center DAViS l'onn 2019.

Incumbensa clera – far avanzar las stentas da digitalisaziun dal Chantun 

L'istorgia dal nov institut DAViS cumenza gia il 2018, cura che la Regenza dal chantun Grischun ha dà l'incumbensa da stgaffir e da manar il center DAViS ed al ha dotà supplementarmain cun ina professura speziala. La finamira da lezzas uras: porscher servetschs interdisciplinars per l'economia regiunala, l'industria ed il turissem ed esser in motor da la digitalisaziun en il Grischun. «Che nus avain pudì transfurmar il center en in institut independent a l'entschatta da l'onn, mussa ch'il DAViS ha ademplì sia incumbensa cun bravura e ch'el po far avanzar la digitalisaziun er en l'avegnir», di Heiko Rölke, il manader da l'institut. El cumplettescha: «Grazia a nossas novas purschidas en il sectur Artificial Intelligence sco perfecziunament e sco studi procurain nus per ina vasta offerta per tuttas e tuts cun ina fascinaziun per las novas pussaivladads tecnicas.»  

La professura speziala Computational and Data Science ed il svilup dal center DAViS èn stads projects da cooperaziun tranter la SAS Grischun e l'Institut svizzer da retschertgas davart allergias ed asma a Tavau en collavuraziun cun il Center svizzer da calculaziun scientifica a Lugano. Era sch'il DAViS è in institut independent da la SAS Grischun dapi il 1. da schaner 2024, vegn el a mantegnair questa collavuraziun etablida.

Elavuraziun da datas moderna

Las pussaivladads da l'utilisaziun da datas moderna p.ex. cun Deep Learning u en il rom da simulaziuns relevantas per il clima per far prognosas davart ils effects dad auas grondas e lavinas èn in factur situativ adina pli impurtant. Il DAViS porscha qua perscrutaziun, cussegliaziun e servetschs en tut las dumondas da l'elavuraziun da datas moderna. In'expertisa speziala cumpiglia ils secturs datas da log industrialas, sport e Life Science sco era l'integraziun da models CAD e BIM.

Ulteriurs detagls

• fhgr.ch/davis