Cumenzà l’onn da studi cun novas purschidas e puspe cun ina grond dumber da studentas e students
14.09.2026
Cun in augment da novs students da Bachelor cumenza la Scola auta spezialisada dal Grischun l'onn da studi 2026/27. A quest augment contribueschan era ils emprims students dal studi da MedTech. Era novs quest atun èn ils dus studis da Master en Civil Engineering e Data Science. Totalmain 643 studentas e students cumenzan oz da nov in studi en in dals 21 studis a la SAS Grischun.
Cun 643 novas studentas e students è la SAS Grischun partida en il nov onn academic. Passa tschuncanta pertschient dad els han absolvì avant cun success ina maturitad professiunala. Dals novs students derivan 19 pertschient dal Grischun. Malgrà ina leva diminuziun da 35 pertschient tar ils studis da Master, resta il dumber da studentas e students tut en tut stabil en cumparegliaziun cun l'onn precedent, quai che mussa l'attractivitad d'in studi a la SAS Grischun. Per quest semester d'atun èn totalmain radund 2000 inscrits en studis da Bachelor e da Master consecutivs.
Concret cumenzan oz 561 persunas giuvnas lur studi en ina da las purschidas da Bachelor a la SAS Grischun. A quels fan part era l'emprima annada dal studi da MedTech, che vegn purschì sco terza approfundaziun dal Bachelor d'Engineering. Plinavant han las emprimas studentas ed ils emprims students cumenzà lur studi da tgira en il rom da la cooperaziun cun la Scola auta turitgaisa per scienzas applitgadas . Cun ils dus novs studis da Master Civil Engineering e Data Science cumplettescha la Scola auta spezialisada dal Grischun ses portfolio da purschidas. Omadus studis da Master fan part d'ina cooperaziun da tut las otg scolas autas spezialisadas da la Svizra e mainan al diplom Master of Science in Engineering (MSE).
L'avantguardia da la furmaziun professiunala
«Cun studis orientads a la pratica e cun perscrutaziun e svilup orientads a l'applicaziun preparan las scolas autas spezialisadas per activitads professiunalas che pretendan l'applicaziun d'enconuschientschas e da metodas scientificas», citescha il rectur Curcio la Lescha federala davart l'agid a las scolas autas e davart la coordinaziun en il sectur da las scolas autas svizras. Las cifras davart il cumenzament dal studi 2026 mussian quant attractiva che questa via duala saja. «La scolas autas spezialisadas èn a medem temp l'avantguardia da la furmaziun professiunala sco er l'access a las scolas autas per la glieud da professiun», uschia il rectur Curcio.
Ulteriurs detagls
- Studi a la SAS Grischun (en tudestg): fhgr.ch/studium
datotecas
- fhgr-news-studienstart-2026.jpgCun l'approfundaziun da MedTech è a partir da l'onn da studi 2026 il studi da bachelor Engineering a la Scola auta spezialisada dal Grischun en funcziun cumplaina.
La Scola auta spezialisada dal Grischun
Sco scola auta metta la SAS Grischun il focus sin in pensar dinamic ed in agir proactiv. Questa tenuta la gida a concepir l'avegnir. La purschida da studis s’orientescha tenor las sfidas praticas da l’economia e da la societad. Sias 2500 studentas e students en scolaziun e perfecziunament furma ella a persunalitads responsablas. La SAS Grischun porscha studis e perfecziunaments en ils roms «architectura ed inschigneria da construcziun», «medias, tecnica ed IT» sco er «economia, servetschs e scienza d’infurmaziun». En sia perscrutaziun interdisciplinara e transdisciplinara metta ella il focus sin ils temas tecnologias futuras applitgadas, il svilup en il spazi alpin e l'agir tenor princips d'interpresa. Cun sias activitads contribuescha la SAS Grischun al success ed a la cumpetitivitad da persunas, instituziuns e regiuns. Ella ha fermas ragischs en la regiun, è d’impurtanza naziunala ed irradiescha en l’entir mund. fhgr.ch/rm