La SAS Grischun cumenza il semester d'atun cun ina da las pli grondas annadas en l'istorgia da la scola
15.09.2025
In studi a la Scola auta spezialisada dal Grischun è anc adina dumandà. 688 studentas novas e students novs cumenzan oz lur studi en ina da las 20 direcziuns che la SAS Grischun offra. Las purschidas singularas da la SAS Grischun carmalan 80 pertschient persunas extrachantunalas en il Grischun per studegiar. Cun il cumenzament dals studis festivescha la direcziun management da sport oz plinavant in giubileum e beneventa sia dieschavla annada.
Cun 688 novas studentas e novs students noda la SAS Grischun il terz grond dumber da persunas che cumenzan in nov studi en l'istorgia da la scola. Malgrà ina sminuziun da 4 pertschient visavi l'onn precedent resta il dumber da studentas e students tut en tut stabil, quai che suttastritga l'attractivitad d'in studi a la SAS Grischun. Per il semester d'atun èn damai s'immatriculadas radund 2000 persunas per in studi da bachelor resp. in master consecutiv – quai che correspunda ad in nov record.
Ditg concret cumenzan oz 562 persunas giuvnas lur studi en ina purschida da bachelor da la SAS Grischun – dad architectura sur Artificial Intelligence in Software Engineering, inschigneria da construcziun, economia da manaschi, Computational and Data Science, Digital Business Management, Digital Supply Chain Management, Information Science, Mobile Robotics, Multimedia Production fin ad Optoelectronics, management da sport e turissem. 126 novas studentas e novs students èn s'immatriculad:as per in studi da master consecutiv. Ellas ed els sa spezialiseschan en l'avegnir en secturs sco Data Visualization, Digital Communication and Creative Media Production, Engineering, New Business, Sustainable Business Development, Tourism and Change u User Experience Design.
Abilitar umans
«Nossa finamira è da far scuvertas e stgaffir savida, da laschar circular questa savida e d'uschia dar ad umans l'abilitad da sviluppar soluziuns per problems socials relevants», di il rectur prof. dr. Gian-Paolo Curcio. Cun 13 purschidas da bachelor e 7 purschidas da master consecutivas offra la SAS Grischun a persunas interessadas ina vasta paletta da direcziuns da studi che furman ellas a persunas qualifitgadas tschertgadas. «Uschia gidain nus essenzialmain a reducir la mancanza da persunal qualifitgà e persunal da cader», agiunscha Curcio.
10 onns management da sport
Cun il cumenzament dals studis beneventa la SAS Grischun quest onn era 80 manageras futuras e managers futurs da sport. Ellas ed els vegnan preparad:as per las incumbensas multifaras davos las culissas dal sport – davent d'analisar organisaziuns da sport sur sviluppar concepts da marketing fin a planisar e realisar occurrenzas. Var 250 absolventas ed absolvents èn gia activas ed activs en federaziuns da sport, en il marketing e sponsoring da sport, en uniuns ed en la branscha da las medias, da communicaziun e d'events. Ulteriurs champs d'activitad impurtants èn da chattar en il commerzi spezialisà da sport sco er en l'administraziun ed en la politica da sport.
Cunzunt sportistas e sportists d'elita s'interessan per il studi da management da sport, perquai ch'el è adattà a moda optimala per cumbinar il sport d'elita cun in studi. Uschia sa concentrescha inqual absolventa ed absolvent suenter la finiziun dal studi cumplainamain sin la carriera sportiva, savend dad esser preparada per la «carriera suenter la carriera». Uschia era l'absolventa Selina Witschonke, campiunessa svizra, campiunessa europeica e vicecampiunessa mundiala da curling: «La SAS Grischun ha purschì a mai las circumstanzas idealas per cumbinar cun success il sport d'elita ed il studi. Jau n'hai betg mo acquistà savida preziusa ed erigì ina ferma rait, mabain ma sent era preparada fitg bain per mes avegnir sportiv e professiunal.»
Ulteriurs detagls
- purschida da studis da la SAS Grischun: fhgr.ch/studium(en tudestg)
ulteriuras infurmaziuns
datotecas
- fhgr-news-studienstart-2025.jpgDiesch da las 80 studentas e students novs da management da sport emprendan ad enconuscher l'occurrenza da team. Ellas ed els èn la 10avla annada da questa purschida da studi da la Scola auta spezialisada dal Grischun.
La Scola auta spezialisada dal Grischun
Sco scola auta metta la SAS Grischun il focus sin in pensar dinamic ed in agir proactiv. Questa tenuta la gida a concepir l'avegnir. La purschida da studis s’orientescha tenor las sfidas praticas da l’economia e da la societad. Sias 2400 studentas e students en scolaziun e perfecziunament furma ella a persunalitads responsablas. La SAS Grischun porscha studis e perfecziunaments en ils roms «architectura ed inschigneria da construcziun», «medias, tecnica ed IT» sco er «economia, servetschs e scienza d’infurmaziun». En sia perscrutaziun interdisciplinara e transdisciplinara metta ella il focus sin ils temas tecnologias futuras applitgadas, il svilup en il spazi alpin e l'agir tenor princips d'interpresa. Cun sias activitads contribuescha la SAS Grischun al success ed a la cumpetitivitad da persunas, instituziuns e regiuns. Ella ha fermas ragischs en la regiun, è d’impurtanza naziunala ed irradiescha en l’entir mund. fhgr.ch/rm