Sco scola auta agila furman il pensar dinamic e l'agir proactiv las lingias directivas da la SAS Grischun. Cun questa tenuta contribuescha ella cun persistenza a la concepziun da l'avegnir. Il studi e la perscrutaziun èn interdisciplinars e s'orienteschan tenor las sfidas praticas da l'economia e da la societad. Cun sias purschidas da scolaziun pussibilitescha ella a sias studentas ed a ses students, en tut var 2400, da daventar persunalitads fitg qualifitgadas e responsablas. La scola auta porscha studis da bachelor e master sco era perfecziunaments en ils roms architectura, inschigneria da construcziun, Computational and Data Science, Digital Supply Chain Management, Information Science, Management, Mobile Robotics, Multimedia Production, Photonics e turissem. En sia perscrutaziun focussescha ella sin las tematicas tecnologias futuras applitgadas, svilup en il territori alpin ed agir d'interpresa ed ella participescha er a laboratoris reals. La participaziun da tut las commembras e da tut ils commembers da la scola auta contribuescha al svilup da la scola auta spezialisada e da sia qualitad.

Pervi da sia posiziun en il center da las Alps, davent da las metropolas ed amez la natira aspra è la SAS Grischun gia adina stada dumandada d'avair ideas e purschidas innovativas. La scola auta considerescha il svilup d'ideas pli «exigentas» sco privilegi. Ultra da quest spiert da pionier han societads alpinas gia stuì sa fidar ina da l'autra en il passà e collavurar stretgamain per pudair subsister en quest conturn. La solidaritad vivida e la cultura cun las trais linguas rumantsch, tudestg e talian èn caracteristicas essenzialas da la DNA grischuna. Cun sias direcziuns da studi e ses projects da perscrutaziun, ma era sco patruna porta la scola auta spezialisada cun luschezza questa DNA grischuna or en la Svizra ed en il rest dal mund.

Qua As stattan a disposiziun publicaziuns tschernidas da la SAS Grischun en rumantsch/talian.

Rapport annual

La SAS Grischun publitgescha mintg'onn ses rapport annual cun las cifras actualas davart la scolaziun e la furmaziun supplementara, davart projects da perscrutaziun e servetschs. Il rapport annual cuntegna er infurmaziuns dal persunal, il quint economic e la bilantscha. L'introducziun è disponibla en tut las linguas chantunalas.

Rapport da perscrutaziun

Ina survista da las activitads da perscrutaziun da la SAS Grischun dat la publicaziun «Einblicke in die Forschung» che cumpara annualmain. L'introducziun è disponibla en tut las linguas chantunalas.

Magazin da la scola auta

Cun il magazin «Wissensplatz» As dain nus duas giadas l'onn in'invista en las activitads da la Scola auta spezialisada dal Grischun. Mintga ediziun sa deditgescha ad in tema che vegn dilucidà da differentas opticas. Contribuziuns tschernidas vegnan redigidas en rumantsch/talian.