La Scola auta spezialisada dal Grischun ha survegnì la reaccreditaziun instituziunala senza cundiziuns
01.07.2025
Il Cussegl d’accreditaziun svizzer ha reaccredità senza cundiziuns la SAS dal Grischun a chaschun da sia sesida dals 20 da zercladur. Cun quai ademplescha la scola auta cumplainamain las pretensiuns che la Confederaziun fa a scolas autas. La reaccreditaziun instituziunala vala per set onns.
La Confederaziun procura ensemen cun ils chantuns per la coordinaziun, la qualitad, la cumpetitivitad da l’entir sectur da las scolas autas en Svizra. El reglescha quai en la Lescha federala davart l'agid a las scolas autas e davart la coordinaziun en il sectur da las scolas autas svizras ( Lescha da la promoziun e coordinaziun da las scolas autas, LASA). La lescha pretenda da las scolas autas da laschar examinar periodicamain la qualitad da lur instrucziun e perscrutaziun ed era da lur prestaziuns da servetsch, e da procurar uschia per ina garanzia ed in svilup da qualitad a lunga vista. L’examinaziun succeda cun l’accreditaziun instituziunala che è la premissa per il dretg da denominaziun, per las contribuziuns federalas e l’accreditaziun dals programs.
Suenter l’accreditaziun iniziala il 2018 (quella giada anc sco Scola auta per tecnica ed economia) ha il Cussegl d’accreditaziun svizzer reaccredità senza cundiziuns la SAS dal Grischun a chaschun da sia seduta dals 20 da zercladur 2025. L’actuala accreditaziun vala per set onns fin ils 9 da zercladur 2032.
La presidenta, Brigitta M. Gadient ed il rectur da la SAS dal Grischun, prof. dr. Gian-Paolo Curcio, sa legran dal bun attestat che la gruppa d'expertas e d'experts han dà a la SAS dal Grischun. Il rapport mussa che la SAS dal Grischun ademplescha cumplainamain ils standards da qualitad en ils tschintg secturs 1) strategia per garantir la qualitad, 2) governance, 3) instrucziun, perscrutaziun e servetschs, 4) resursas e 5) communicaziun interna ed externa.
"Cun la reaccreditaziun instituziunala è la SAS dal Grischun s'etablida sco scola auta professiunala independenta en la cuntrada da furmaziun svizra. Decisivs per quai èn stads ils svilups en ils secturs da l'instrucziun, da la perscrutaziun, da la furmaziun cuntinuada e dals servetschs, il svilup cuntinuant dal sistem per garantir la qualitad, l'engaschament e las cumpetenzas da las commembras e dals commembers da la scola auta sco er il sustegn da la regenza, da l'uffizi cumpetent e dals partenaris economics", punctuescha Gian-Paolo Curcio.
Suenter l'accreditaziun è avant l'accreditaziun. Ussa sto la SAS dal Grischun analisar las indicaziuns dal rapport da las expertas e dals experts e deducir da quellas indicaziuns las mesiras correspundentas per sviluppar vinavant la SAS dal Grischun. La garanzia da qualitad cuntinuanta ed il svilup da la scola auta restan en il focus da la SAS dal Grischun, tant dapli che las pretensiuns a las scolas autas vegnan adina a crescher vinavant.
ulteriuras infurmaziuns
