In record da studentas e students marchescha in ferm onn
13.06.2025
Il 2024 è stà per la Scola auta spezialisada dal Grischun in onn per instradar novs projects. Cun in record da 715 novas studentas e novs students da bachelor e da master e la dumonda creschenta en la furmaziun supplementara, ha la scola auta dà ferms impuls per l'avegnir. Entant che l'onn è stà marcà emoziunalmain da l'emprima badigliada per il Center da scola auta spezialisada dal Grischun e da la midada en la direcziun da la scola da prof. Jürg Kessler a prof. dr. Gian-Paolo Curcio, han mesiras da spargn manà il medem mument ad in volumen da perscrutaziun reducì.
Orientà vers l'avegnir, pretensius ed emoziunal – cun quests pleds pon ins descriver l'onn 2024 da la SAS Grischun. Per l'ina orientà vers l'avegnir, perquai ch'il dumber da studentas novas e students novs en las purschidas da bachelor e da master è creschì per stgars otg pertschient cumpareglià cun l'onn avant. En il sectur da la furmaziun supplementara ha la SAS Grischun schizunt pudì registrar in augment da passa 31 pertschient. Questa creschientscha è d'attribuir cunzunt a programs novs cun l'accent intelligenza artifiziala. Per l'autra è l'emprima badigliada per il Center da scola auta spezialisada dal Grischun stà in mument decisiv per la SAS Grischun. L'edifizi nov vegn a posiziunar la scola auta sin plaun naziunal ed internaziunal en scienza e perscrutaziun ed è in pass central per il svilup ulteriur da l'instituziun.
Pretensius è l'onn 2024 percunter stà surtut en il champ da la perscrutaziun. Sin fundament da mesiras necessarias per cuvrir ils custs supplementars ha la SAS Grischun stuì reducir l'acquisiziun da meds finanzials da terzs e desister d'intgins projects da perscrutaziun. Quai ha manà ad ina reducziun dal volumen da perscrutaziun da quasi diesch pertschient en cumparegliaziun cun l'onn precedent. Quant enavant ch'il volumen da meds finanzials da terzs vegn puspè a s'augmentar è da preschent avert – en spezial en vista a las discussiuns actualas davart las mesiras da spargn sin plaun federal che vegnan ad avair consequenzas concretas anc betg previsiblas per la finanziaziun da la perscrutaziun.
Emoziunal è l'onn passà stà – ultra da l'emprima badigliada – surtut, perquai ch'è ida a fin il december ina èra impressiunanta cun la surdada d'uffizi dal directur da blers onns prof. Jürg Kessler a prof. dr. Gian-Paolo Curcio. Sut la batgetta da prof. Kessler è la SAS Grischun sa sviluppada ad ina scola auta independenta cun in dumber da studentas e students cleramain creschent e cun ina ferma posiziun en la perscrutaziun applitgada. A medem temp marchescha la midada en la direcziun da la scola ina nov'entschatta che signalisescha betg mo dal punct da vista persunal, mabain era strategic ina nova orientaziun. Cun la clera finamira da sviluppar vinavant la via enchaminada e metter novs impuls per l'avegnir da la scola auta ed il medem mument per la societad.
Per la perioda strategica 2025-2028 planisescha la scola auta damai da sviluppar novas direcziuns da studi e da metter accents; tranter auter areguard l'innovaziun en la tecnica e l'IT, il svilup economic e la tgira integrada da spazis alpins. Cun questa strategia vul la SAS Grischun amplifitgar ulteriuramain sia rolla sco instituziun impurtanta per savida ed innovaziun en la regiun e sur ils cunfins chantunals ora. Cifras detagliadas ed ulteriurs puncts culminants da l'onn passà chattais Vus en il rapport annual 2024 cumparì dacurt ed en il rapport da perscrutaziun accumpagnant.
Ulteriurs detagls
- rapport annual 2024 (era cun cuntegns rumantschs)
- invistas en la perscrutaziun 2025 (era cun cuntegns rumantschs)
- strategia 2025-2028
ulteriuras infurmaziuns
La Scola auta spezialisada dal Grischun
Sco scola auta metta la SAS Grischun il focus sin in pensar dinamic ed in agir proactiv. Questa tenuta la gida a concepir l'avegnir. La purschida da studis s’orientescha tenor las sfidas praticas da l’economia e da la societad. Ella porscha a passa 2200 studentas e students ina vasta offerta da furmaziun e da perfecziunament ed als permetta uschia da sa sviluppar a persunalitads responsablas. La SAS Grischun porscha studis e perfecziunaments en ils roms «architectura ed inschigneria da construcziun», «medias, tecnica ed IT» sco er «economia, servetschs e scienza d’infurmaziun». En sia perscrutaziun interdisciplinara e transdisciplinara metta ella il focus sin ils temas tecnologias futuras applitgadas, il svilup en il spazi alpin e l'agir tenor princips d'interpresa. Cun sias activitads contribuescha la SAS Grischun al success ed a la cumpetitivitad da persunas, instituziuns e regiuns. Ella ha fermas ragischs en la regiun, è d’impurtanza naziunala ed irradiescha en l’entir mund. fhgr.ch