Ina midada da perspectiva

Il svilup dal turissem sa mo avair success, sch’el vegn cumbinà pli ferm cun dumondas dal svilup regiunal. A questa conclusiun vegn in nov studi da l’Institut per turissem e temp liber da la SAS Grischun. El analisescha per l’emprima giada da maniera sistematica co che turissem, societad, economia, ambient ed infrastructura èn entretschads en il chantun Grischun. En il center stat l’uschenumnà «turissem da 360°». Quel descriva in access integral che vesa  il turissem sco sistem dinamic e connectà da tut ils pertutgads e che collia las experientschas dal giast, la qualitad da viver ed in svilup regiunal persistent. «Il turissem pertutga bler dapli che giasts e menaschis. El influenzescha  il spazi d’abitar, il martgà da lavur, l’infrastructura e la qualitad da viver da la populaziun. Questas correlaziuns ston en l’avegnir vegnir ponderadas dapli da maniera cuminaivla», di la co-manadra dal project Bianca Schenk. En il Grischun datti bain gia numerusas iniziativas innovativas, quellas sajan dentant savens fragmentadas e memia pauc connectadas ina cun l’autra.

Il studi recumonda perquai ina midada da perspectiva: davent dal focus sin la branscha ad ina chapientscha sistemica  dal turissem. «Il Grischun dispona d’ina fitg buna situaziun da partenza, per manischar en avegnir il turissem sco sistem turistic integrà, pia sco interacziun da l’economia, da la societad, da la natira e da l’infrastructura», di il co-manader dal project Dominik Knaus. Concretamain han ins identifitgà tschintg champs d’acziun centrals:

• Societad
• Economia e lavur
• Spazi & infrastructura
• Ambient & spazi da divertiment
• Governance
   

Quests champs d’acziun mussan ch’il turissem sto vegnir chapì  adina dapli sco part d’in sistem regiunal cumplex.

Rolla da pionier per il chantun Grischun
Ils resultats dal studi furneschan ina basa impurtanta per l’ulteriura realisaziun da la strategia turistica dal Grischun. Els duain avair en mira da colliar anc pli ferm la creaziun da valur economica, la qualitad da viver da la populaziun e la protecziun da spazis da natira e da viver. Uschia duai il chantun Grischun occupar ina rolla da pionier tar l’ulteriur svilup d’in model turistic integral e persistent.

Perscrutaziun orientada a la pratica
Cun ina perscrutaziun applitgada e cun projects da svilup orientads a la pratica presta l’Institut per turissem e temp liber da la SAS dal Grischun ina contribuziun a l’ulteriur svilup dal turissem. Ins elavura da maniera activa oravant tut ils process da transfurmaziun dal turissem svizzer e grischun en ils tschintg champs tematics societad, economia e lavur, spazi & infrastructura, ambient & spazi da divertiment sco era en la Governance cun ils trais secturs da perscrutaziun «transfurmaziun digitala en il turissem», «structuras dal turissem e dal temp liber» e «spazis da vita turistics», per chapir, accumpagnar e elavurar midadas.

Ulteriurs detagls

• Davart il studi «Perspectiva da 360° dal spazi da vita turistic dal Grischun» (en tudestg): fhgr.ch/360-tourismus

Ulteriuras occurrenzas

Ils resultats dal studi vegnan approfundads e discutads ensemen cun persunas expertas a chaschun da duas occurrenzas. In webinar porscha in’invista cumpacta en las enconuschientschas ed implicaziuns centralas, entant ch’il 2. ITF-Barcamp dat spazi ad in barat avert ed ad ina discussiun ed ad in ulteriur svilup cuminaivel das ideas.

• Webinar (en tudestg) «Eine 360° Perspektive des Bündner Tourismuslebensraums»
• 2. ITF-Barcamp (en tudestg): «Veränderung in Tourismus und Freizeit»