Rapport annual 2022 da la Scola auta spezialisada dal Grischun
16.06.2023
La Scola auta spezialisada dal Grischun (SAS Grischun) ha publitgà il rapport annual per l'onn 2022. En quel guarda ella enavos sin in onn da success. Ella è cunzunt stada focusada sin las contribuziuns per il svilup regiunal cun l'avertura da dus lavuratoris reals. Finanzialmain finescha la scola auta l'onn da gestiun cun ina nulla naira ed in surpli dal retgav da 42'499 francs. In resultat plaschaivel, damai ch'ella aveva budgetà ina perdita da 0.5 milliuns francs.
Cun l'avertura dals dus lavuratoris reals en Surselva ed en Bregaglia ha la SAS Grischun expandì sia preschientscha fisica en las regiuns e rinforzà vinavant la collavuraziun tranter la perscrutaziun e la pratica. Cun actur:as al lieu vegn lavurà communablamain vi da schliaziuns per sfidas regiunalas concretas. En il «Surselva Lab» a Glion ed en il «Bregaglia Lab» a Stampa han las lavurs cumenzà, occurrenzas èn organisadas ed emprims projects lantschads. Ulteriurs lavuratoris reals en autras regiuns dal chantun èn planisads.
Cun ses projects da perscrutaziun promova la SAS Grischun plinavant la forza innovativa dal chantun. Uschia sustegna ella per exempel manaschis industrials cun il svilup da schliaziuns per la protecziun cunter privels da la natira. Pervi da la midada dal clima s'augmentan quels er en il Grischun. Ina buna interacziun tranter acturs involvids d'organisaziuns privatas e dal dretg public è perquai decisiva. Ina survista da las activitads da perscrutaziun da la SAS Grischun mussa il rapport «Invista en la perscrutaziun» publitgà dacurt. Il volumen da perscrutaziun cuntanschì è vegnì augmentà il 2022 per 9.6 pertschient sin 11.4 milliuns francs. A la fin da l'onn èn stads en elavuraziun total 306 projects.
La scola auta spezialisada sco creadra da valur
La SAS Grischun na presta cun sias activitads betg be ina contribuziun per il svilup dal chantun, ma è era sezza daventada in impurtant motor per l'economia. Tenor il studi «Effects economics regiunals da la Scola auta spezialisada dal Grischun», publitgà da la BAK Economics SA e da la econcept SA, generescha la scola auta cun in franc da meds chantunals ina valurisaziun d'almain 4.30 francs. Cun sias activitads da perscrutaziun e svilup promova la SAS Grischun plinavant il progress tecnic. L'edifizi nov dal Center da scola auta spezialisada dal Grischun planisà stgaffescha ulteriurs potenzials da svilup.
Lev surpli dal retgav
L'onn da gestiun 2022 ha la SAS Grischun terminà cun in gudogn da 42'449 francs. Cumpareglià cun l'onn avant è il retgav vegnì augmentà per 5.5 pertschient sin 64,9 milliuns francs. Il retgav da meds finanzials da terzs en la perscrutaziun ed ils servetschs è s'augmentà per 1.5 milliuns francs, ina tendenza legraivla suenter ils onns che la pandemia da Covid è stada en il center. En pli han las subvenziuns da la Confederaziun pudì vegnir augmentadas per 0.9 milliuns francs pervi dal bun dumber da studentas e students durant ils onns marcants 2020 e 2021. Las contribuziuns dal chantun purtader Grischun èn s'augmentadas il 2022 da 15 milliuns francs sin 16 milliuns francs. Cun quests daners chantunals ha la SAS Grischun gudagnà stgars 50 milliuns francs. Questa contribuziun represchenta la contribuziun da la scola auta spezialisada a la forza economica dal chantun Grischun.
Tecnica – tradiziun e finamiras
Il svilup regiunal e la promoziun dal «braingain», da l'immigraziun da persunas qualifitgadas, vegn er ils proxims onns ad esser in pensum central da la scola auta. Durant l'onn current – l'onn da giubileum – stat il svilup dal champ «tecnica» en il center. Cura ch'ins ha fundà avant exact 60 onns il «tecnicum da la saira», è la mancanza da persunal qualifitgà en las professiuns tecnicas stada la raschun da stgaffir ina tala instituziun en la regiun. Ed er oz èn la scolaziun d'inschigners per eliminar la mancanza da persunal qualifitgà e la collavuraziun da la perscrutaziun applitgada e dal svilup cun la branscha da hightech puncts centrals da la SAS Grischun. En quest connex persequitescha la scola auta spezialisada era l'extensiun sias activitads en la perscrutaziun da tecnologias futuras sco la sensorica, la robotica e la fotonica. Ultra da quai prevesa la scola auta da cooperar dapli cun universitads en programs da joint-master. In exempel è il studi da master «Digital Communication and Creative Media Production» purschì quest onn per l'emprima giada ensemen cun l'Universitad da Friburg. Talas purschidas pussibiliteschan a las studentas ed als students in access multifar a programs da bachelor e master – fin al doctorat.
Ulteriurs detagls:
- Rapport annual 2022
- Invista en la perscrutaziun – ediziun matg 2023
- «Effects economics regiunals da la Scola auta spezialisada dal Grischun», studi da la BAK Economics SA e la econcept SA
ulteriuras infurmaziuns
Scuola universitaria professionale dei Grigioni
Quale scuola universitaria intraprendente, la SUP Grigioni punta sul pensiero dinamico e sull’approccio proattivo. Con questo modo di pensare contribuisce a plasmare il futuro in modo sostenibile. L’insegnamento e la ricerca presso la Scuola universitaria professionale dei Grigioni sono interdisciplinari e orientati alle sfide pratiche nell’economia e nella società. La SUP Grigioni forma i suoi ben 2'400 studenti a diventare personalità altamente qualificate e responsabili. Essa offre cicli di studio e corsi di perfezionamento in Architettura, Ingegneria civile, Computational and Data Science, Digital Supply Chain Management, Information Science, Management, Mobile Robotics, Multimedia Production, Photonics nonché in Turismo. Nella propria ricerca, la SUP Grigioni si concentra sui temi delle tecnologie future applicate, dello sviluppo nell’area alpina e dell’attività imprenditoriale, agendo anche in modo partecipativo all’interno di laboratori reali. La partecipazione attiva di tutti gli attori della scuola universitaria contribuisce al continuo sviluppo della stessa nonché della qualità dell’intero l’istituto. fhgr.ch